【廿四孝爸爸】王祖藍生日都為囡囡着想

藝人王祖藍尋日（9日）40歲生日，獲老婆李亞男及1歲愛女Gabrielle為佢慶生，向來係廿四孝爸爸嘅佢，就連自己生日都處處為囡囡着想，一家三口去到主題樂園慶祝，認真有心。李亞男喺社交網上載合照，並留言：「老公40歲生日快樂，我和寶貝永遠愛你喔。」當中Gabrielle着上紅色裙盛裝上陣，同身旁嘅卡通人物襯到絕！

同王祖藍因節目《奔跑吧》結緣，成為好兄弟嘅男星鹿晗以及陳赫，都分別透過社交網送上生日祝福，其中鹿晗上載一張王祖藍，換上「哪吒」扮相嘅造型照，並喺相中寫上「十全十美」、「美麗動人」、「帥氣逼人」等字眼，大賣口乖。