出盡全力掌摑　黃智賢打到老婆頭揈揈

藝人黃智賢（Ben）於新劇演上流社會公子，恃勢凌人，當中更有一場怒摑妻子陳自瑤（YoYo）戲份，由於拍攝時出盡力掌摑，對方來不及反應登時呆住，Ben見狀即喪「耍冧」，笑言現實生活若與太太不咬弦只會打牆發洩，絕不會虐妻！

劇中演上市公司主席梁舜燕的富二代兒子，可謂要風的風，就連感情方面也要另一半順從，一場講述Ben掌摑妻子YoYo戲份，Ben坦言心理壓力非常大：「我通常都係畀人打多，今次要好嬲咁打老婆，其實寧願畀人打好過，因為對手會幾辛苦，多謝YoYo信任，度晒位，本來諗住借位少少掂到就算，但又唔夠震撼，佢叫我照打，都幾戥佢肉痛，我隻手板好大，佢塊面又細，真係食晒我啲力，要就住力又好假，結果打完摑完佢真係呆咗！佢個頭都Fing一Fing出去，之後不停講唔好意思。」

雖然於劇中虐妻，但現實中乃愛妻號的Ben，笑言打老婆絕對唔要得，他說：「我嬲寧願唔出聲或者走咗去，等自己度氣過，諗清楚點做，我試過同太太嗌交，嬲到自己打牆發洩，但最後都係自己氹番佢。」對於劇集以股票市場為背景，Ben表示持穩陣藍籌股約10年，平時由太太掌控，期間也有薄利：「貪佢派息派得多，錢好辛苦搵嘛，股票之外我仲有買樓投資，希望將來退休靠佢。」