未夠一年已分手！阮政峰咖啡師舊愛晒新仔

喺《愛．回家之開心速遞》飾演「池子孝」而入晒屋嘅阮政峰，上年傳出撻着拍檔「Bonnie」林凱恩，阮政峰為撇清關係而公開已經有個好清純嘅咖啡師女友Liz，2019年9月時就話拍拖大半年，又不斷喺社交網大晒蜜照，不過睇嚟已成追憶，兩人都分別將所有合照刪走，未夠一年已經分手！而Liz更將阮政峰喺北海道為佢影嘅相，有關對方所有嘅Tag移除！前兩日嘅情人節，Liz就喺Ig Story上載手拖手合照，兩手戴上情侶手繩，Tag咗一個名，似乎已經有新歡！

另一邊廂，阮政峰喺2019年12月29日，曾上載一張獨照並留言：「Don＇t cry because it’s over, smile because it happened.（不要因為結束而哭泣，要為曾發生過而微笑。）」似乎有所意思！而Instagram剩下嘅照片大多都係關於《愛．回家》，當然唔少得Bonnie，最近一張係同另一拍檔兼女神鄺潔楹「一家三口」合照！

及後，阮政峰再喺社交網回應，佢上載一張風景相，寫道：「本意想低調處理，係較早前，我哋決定分開。首先係到多謝大家關心，我哋分開嘅原因並沒有涉及第三者，希望大家不要再胡亂猜測，感謝大家，祝大家身體健康！」