張繼聰勁迷《想見你》　謝安琪變彩蛋

天后謝安琪（Kay）同老公張繼聰近排沉迷煲台劇《想見你》，阿聰仲話自己睇完一次後，陪Kay又睇多次，睇嚟佢真係好鍾意，而佢呢排仲攞番支結他出嚟自彈自唱，唱咗幾首劇中出現嘅舊歌，引起粉絲同圈中好友大讚好聽。之後佢仲彈咗伍佰嘅《Last Dance》，但就話：「咁多人叫我唱，我叫佢唱。」原來佢送咗個彩蛋畀大家，就係叫咗老婆Kay獻聲！

畫面中見到阿聰認真專注彈結他伴奏，而背景就傳嚟Kay充滿感情嘅悅耳歌聲，但就只聞「Kay」聲不見「Kay」人！雖然Kay未有露面，但兩公婆呢次「合體」表演已令粉絲十分驚喜，蔡思貝都留言大讚兩人係「perfect team」，而C君老婆兼DJ黃天頤就搞笑留言：「唔好咁屈機你兩個」，一眾粉絲亦大讚好正，又希望下次可以見埋Kay個樣。