梁芷珮疫境襟撈　夠使大半年

憑無綫旅遊節目《潮什麼》系列成功入屋嘅藝人梁芷珮，近日喺疫境下，竟然獲得廣告商垂青，拍攝漱口水廣告，酬勞方面仲有成接近六位數字咁多，佢話：「幾開心可以拍一個咁大型嘅廣告，我對自己啲牙向來都有信心，我冇箍過牙，啲牙都幾齊，淨係有去漂吓牙，等上鏡好睇啲，所以當接到呢個廣告，我都冇擔心啲牙唔靚。造型係好斯文，比起我平時節目，背心短褲，自己都唔係好睇得慣，但我老公睇到個造型都話幾好。」

除咗呢個廣告之外，梁芷珮仲接拍唔少網上廣告，計計埋埋佢話酬勞夠晒大半年使：「其實係呢個疫情之下，仲接到電視廣告都覺得好感動，可能依家唔係好多公司會攞錢出嚟，除咗呢個廣告，其實由我喺歐洲返嚟，我嘅工作真係未停過，網上廣告我都接咗好幾個，唔知道係咪個天知道我暫時冇得飛去拍旅遊節目，所以畀番啲廣告收入我，呢兩個幾月拍嘅廣告，都夠我哋使大半年。」

梁芷珮原定會帶團去希臘，但因疫情關係，都要順延至明年五月：「如果疫情喺呢幾個月減退，全世界都冇事，啲團友都想快啲九月去嘅，但依家大前提係要冇事先。」