關智斌轉型玩變態 溫碧霞封后唔認自己功勞

2020年05月23日 00:08
東網電視
更多新聞短片
劇本都寫緊,隨時原班底再拍。
藝人溫碧霞(Irene)身穿低胸長裙與關智斌(Kenny)出席英皇電影《墮落花》首映,Irene表示心情興奮,等了這日很久:「本身喺復活節上,但因為疫情關係,所以就延遲,大阪電影節同意大利影展又去唔到,但係戥成部戲嘅人好開心,因為我得到嗰個獎(「第八屆絲綢之路國際電影節」的「最佳女主角」)唔係我一個人嘅功勞,係成個Team同導演拍得好,演員又做得好,Kenny嘅演出好大膽,我都未見過自己咁。」
問Kenny今日邀請了甚麼朋友來欣賞?他即一臉愕然笑說:「吓!乜可以請朋友嚟咩?我第一次好榮幸可以有自己咁個大舞台嘅首映。」
Irene就表示老公請了很多朋友一齊來捧場:「老公之前喺亞洲電影節都睇咗套戲。(有咩評語?)佢好鍾意,話我好大突破,好唔一樣,讚故事寫得好好,有好多思考空間。」問他們可會再合作? Irene大爆:「導演已經寫緊另一個劇本,好似話想搵返原班人一齊拍。」
Kenny亦表示很開心:「之前我都係演乖仔嘅角色,但今次角色有啲變態,都花咗好多功夫,好彩導演同Irene喺拍前都有同我傾點拍。」講到劇中有不少情慾戲,Kenny表示拍攝時不尷尬:「因為大家都好專業,現場都好多人。」Irene笑言自己有要求清少少場,但Kenny則笑言反而第一次睇試片覺得尷尬:「因為調色、加咗配樂、剪接,成件事就比想像中大膽。」
另外,同場的吳浩康日前大爆前度崔碧珈指他「講大話」及「扮上進」是誣衊,未知是否避免事情發酵,他不接受訪問。