米雪否認劉松仁中風：佢跌親要慢慢行

藝人米雪和麥長青（麥包）出席親子活動，對於近日與疑似中風的好友劉松仁飯敍，她表示當日同場還有與80年代合作過的監製及導演，眾人久不久聚會，大讚劉松仁身體不俗，還不時練習氣功，問到對方是否中風？米雪否認說：「唔係，佢之前演舞台劇，喺後台Kick到跌親，所以要休息，應該唔係中風囉！佢依家好精神又精靈，跌親要好小心慢慢行，醫生叫佢唔可以大步行，佢又真係好聽話，唔似得我跑步整親腳，本來要休息兩個月，我第三日已經跑番。」米雪指劉松仁近排忙於開會，為舞台劇稍後於其他地方演出作好準備。

麥包透露近日網上平台直播工作，既夾Band唱歌，又與品牌合作搞賣貨，寄望能找到一條搵錢新出路。談到其官司進度，他表示明日再次上庭等待法官宣判，問到事件是否將告一段落？他說：「當係，因為對方喺庭上承認我唔係騙徒。（太太喺呢段時間好憂心？）呢啲遲啲先講，等官判咗先！」