陳山聰升呢做老竇　親自為B仔剪臍帶

43歲陳山聰做爸爸喇！佢喺社交網晒出一家三口合照，佢留言：「人生馬拉松中最美麗的畫面，感恩。#daddy希望你成為一個充滿正能量健康快樂頂天立地的男子漢」陳山聰透露B仔英文叫Jaco，係單立文夫婦起嘅。真係好有愛呀！

陳山聰受訪時，仲話親自剪臍帶，透露B仔重7磅1，BB鼻翼好闊，耳珠好長，好有「福」相，佢話：「入醫院時唔緊張，喺產房等老婆時，已經忍唔住流下爹哋淚，呢種感覺好奇妙，入到去拖住老婆隻手，佢真係冷靜到一個點，佢叫我鎮定啲唔好喊，跟住醫生好快拎BB出嚟，B仔喊咗幾聲，之後即刻笑，阿仔好鍾意笑。」佢又話幫B仔剪臍帶時，係人生最開心嘅時候！佢又感謝《超能使者》監製文偉鴻嘅幫助：「因為仲有幾個景要拍，佢都好盡量調動，生時佢放咗我兩日假，之後拍兩日通宵，喺醫院瞓咗一陣，就接咗兩母子返屋企。」