陳展鵬低潮做過地盤佬 姚子羚做啤酒妹遭非禮

20200717
東網電視
更多新聞短片
英雄莫問出處!陳展鵬、姚子羚、蕭正楠、曹永廉大紅之前都嘗過人生低潮。
以往成為藝人最常見係由星探發掘,不過唔係個個有幸喺讀書時期或剛畢業遇上,而且「打死一份工」未必係好事,究竟佢哋投身娛樂圈前係做咩職業?
陳展鵬
當大家認為陳展鵬撇唔甩亞視陣除時,其實佢係參加無綫藝員訓練班第7期入行,1998年更簽過唱片公司做歌手,可惜金融風暴令佢工作大減,最低潮時期投身地盤界,半年後因腳傷辭職,後來加入亞視,2008年再返無綫憑《城寨英雄》「拳佬」一角奪得視帝!
蕭正楠
與陳展鵬為小學同學嘅蕭正楠,大學修讀電腦系,畢業後做過電腦程式員,估都估唔到個性幽默風趣嘅,原來曾經做過I.T.行業。黃翠如電腦壞咗都唔使出去搵人整喇!
曹永廉
曹永廉入行前除咗做過超市經理及童裝售貨員,仲做過胸圍推銷員,係現實版《絕世好Bra》!憑佢做過sales嘅工種,加埋拍劇多年成功入晒屋,深得師奶歡心。
姚子羚
姚子羚爸爸生意同樣受金融風暴影響,當時於澳洲讀大學嘅佢都要放棄學業,曾做過兼職啤酒推銷員幫補生計,有次更遭客人拍打屁股非禮,幸得菲藉同事出手幫助。
陳茵媺
於多倫多安大略大學藝術與設計學院畢業嘅陳茵媺,曾先後於繪圖設計公司及時尚雜誌工作。從小憧憬成為香港小姐嘅佢,2006年回港參選並勇奪冠軍,簽約於無綫當藝員,繼而與老公陳豪組織家庭,相夫教子做幸福少奶奶。
郭藹明
1991年港姐冠軍郭藹明出名美貌與智慧並重,於美國南加州大學修讀機械工程學碩士學位,曾一度傳出佢入選美國太空總署(NASA)擔任見習工程師,最後否認傳聞,指當年只係喺一間私營公司實習。
謝安琪
謝安琪畢業於翻譯及語言學,講得一口流利英語,入行前擔任過英文老師,熱愛音樂嘅佢後來投身樂壇,成為天后。
同場加映:
唔少女藝人入行前做過空姐,包括黃智雯、劉佩玥、朱智賢、AGA、李若彤、譚小環、郭羨妮等,唔知有冇人被佢哋serve過呢?