扮可憐谷歌　胡鴻鈞求100萬點擊：唔係好過分啫！

歌手胡鴻鈞的新歌《你幸福嗎？》MV正式播出，於社交網直播，坦言心情很澎湃：「呢首歌等咗30年，終於面世，由創作、錄音到後期製作、MV拍攝，呢幾個月係非常煎熬，自己好心急，但又急唔嚟！」期間，他又播歌「逼」大家聽，更邊聽邊唱，非常自High，不過網民都好興奮，不斷留言鼓勵，更表示大家一齊唱。

胡鴻鈞又謂：「如果大家有留意我近呢幾隻歌MV，都係影啲靚仔Shot，故事交畀其他演員去演，但今次隻歌對我嚟講好大感受，所以自己都參與其中。」他又指本來MV於台灣拍攝，但自己無法飛過去，又參與不到，故最終留在香港拍攝。

之後他又扮可憐謂：「希望大家喜歡呢隻歌，希望隻歌OK，如果唔係自己都唔知點做落去，我會好大打擊，大家支持吓啦！畀吓面聽吓囉！鍾意分享畀啲親戚朋友聽吓囉！撳一次睇就係對我嘅支持，希望可以到100萬點擊，都唔係好過分啫！」大家不如真係幫吓胡鴻鈞，聽吓佢首新歌啦！