縫幾百針！阿嬌頭撼雲石　搵整容科院長幫拖

英皇藝人鍾欣潼（阿嬌）昨日凌晨在廈門酒店內的洗手間，突然見暈成個頭撼落雲石邊，撞爆眉骨急送入院，傷口長達6cm，在急症室縫了數十針，為保住阿嬌標致的靚樣，昨日傍晚她進行了第二次手術，經任達華介紹由頂級整形科院長拆線後重新縫針。

阿嬌經理人霍汶希（Mani）今日回覆說：「係呀，阿嬌開咗第二刀，重新再縫合傷口，總共縫咗幾百針，因為嗰位係整形科醫生，所以針線方面細好多，表面第一層已縫咗66針。」Mani透露阿嬌頭部昨晚開始好痛，瞓唔到覺，要食消炎及止痛藥，今日眼部及額頭位置都腫起來需要敷冰。

問到嬌媽可會飛廈門照顧阿嬌？Mani直指阿嬌唔畀媽咪飛廈門：「佢話唔想再照顧多個人，阿嬌自己都好Tough（堅強），佢都唔想媽媽嚟到要隔離14日。不過阿嬌出事嗰刻，嬌媽一聽到消息已經嚇到喊！」