《愛．回家》「五一」黃手套搞破壞　無綫誓要緝拿真兇

無綫處境劇《愛．回家之開心速遞》緊貼社會劇情，尋晚播出嗰集，講到飾演「根叔」嘅劉丹不滿被「雷公」加租十倍，扮成「租霸」將辦公室搞到立立亂，最後熊家全體人員着上全副保護衣、戴住黃色手套幫手收拾爛攤子，造型似足新冠肺炎疫情醫護情景。有網友發現掛喺電腦屏幕上嘅手套擺住「五大訴求、缺一不可」手勢，片段播足14秒，網民揚言要罷睇。

無綫官方回應：「已經睇過昨晚播出片段，該場面確實已播咗出街，究竟係有心被做出呢件事定係巧合，在公司來講巧合嘅機會比較細，相信係有心人刻意做出破壞情況出嚟，公司會嚴肅了解事件，搵出呢啲故意製造破壞嘅人，無綫絕對不能接受亦不能容忍類似事件發生，由於事件牽涉太多人，要搵出涉事者唔容易，但都係必須去做嘅事。」

其實網上一直有網民討論，質疑編劇政治立場方向。去年6月曾上演過驅散示威者嘅場面，11月講到「金城安」周嘉洛飽受欺凌，壓力爆煲留下「遺書」。而同年8月，余詠珊愛將監製李志倫疑因捲入政治風波被解僱。

TVB改鏡頭避爭議

而今日傍晚時分，此集於myTV SUPER片段已被更換，黃色手套正面掛於電腦上的畫面已用其他鏡頭代替，有些則改用遠鏡的畫面。