躁底打機掟手掣　謝東閔陪朱智賢行山助復出

藝人謝東閔出席電競賽車活動時即席坐上賽車一顯身手，自認是「機迷」，最叻玩足球Game，而賽車Game都唔差，曾經最高課金兩萬元：「嗰陣要代表公司去美國、日本參加電競比賽，就要增強隊波嘅戰鬥力，為港爭光！（有贏到？）贏咗兩個歐洲嘅代表，但輸咗喺日本。」

每次打機他都會全程投入，現在要將精力、心機放在演藝工作上，惟有忍痛割愛，將遊戲機送給朋友，兩年前開始就跟遊戲機漸漸疏遠：「試過玩角色扮演嘅遊戲，一玩就18個鐘！（曾被女友投訴？）絕對有，佢會對我發脾氣。」續自爆打機屬暴躁類型，試過嬲到掟爛手掣：「我唔會講粗口，但會將呢份鬧發洩喺行動上。」

講到現任女友朱智賢近日疑似為復出試水溫，密密於社交平台大晒運動照，問是否正鋪路復出？謝東閔表示唔清楚：「呢樣嘢要問公司，但大家都係做啲健康活動，就好似行山、食飯、見朋友，我都有同佢一齊行山。（朱智賢心急復出？）冇問佢，要睇公司安排，我就梗係好支持佢。」