胡杏兒得償所願奪最佳演員 老公激動發長文示愛

2020年12月06日 10:34
東網電視
更多新聞短片
恭喜晒!
視后胡杏兒早前為咗接受新挑戰,而離家出走4個幾月到大陸參加節目《演員請就位2》,尋晚終於嚟到最後一集,杏兒更得償所願,奪得年度最佳演員!
喺宣布結果一刻,杏兒一面難以置信嘅樣子,喺影后惠英紅手接過獎項後,邊忍淚邊講感言,佢覺得好幸福同幸運,可以同5位咁優秀嘅導演合作,表示等咗21年終於有機會同陳凱歌合作:「非常幸運,沒想過我有這樣的一天!」又話下1年一定會叫啲朋友嚟參加!之後佢再多謝喺台下嘅吳鎮宇及秦沛,聽到秦沛話自己75歲覺得好感動,希望自己80歲仲可以企喺呢個舞台,可以得到觀眾嘅喜愛!之後佢於社交網發長文分享感受,講到有網友記得佢上一次得獎正正9年前,憑《萬凰之王》奪得視后寶座:「有網友說,原來我上一次拿獎是2011年12月5號,沒有想到9年之後的同一天會有這樣的一個經歷。」
而杏兒老公Phil就激動得發英文長文祝賀老婆,佢話杏兒當時同佢講參加現場表演比賽並唔容易,但可以同有才華嘅演員及優秀導演合作嘅機會同經驗係值得,大讚老婆一直以嚟就算幾困難都從未抱怨,為佢感到好驕傲!又笑言係時候返屋企喇,佢同大仔Ryan都好掛住佢呀!
而秦沛更同埋姜大偉一同到場支持爾冬陞(小寶),秦沛出場時就話自己從3歲開始演戲,演過超過300部電影、200多套劇集,佢話如果要用一個字送畀電影人嘅話,會用個「愛」字,而姜大衛就話會為演員們送上一個「真」字!之後小寶就率領黃奕等演員出場,3兄弟難得喺台上合體!佢話當節目叫佢想一個字時,佢就諗起「家」字,最後佢叮囑新一代演員要團結,見到有人遇到困難,要伸出援手去幫忙。