《造星III》多戀事！男女大混戰　有一Pair參賽前已經拍拖

今個Boxing Day（26日）就係ViuTV選秀節目《全民造星III》總決賽，點知選完大家最關注嘅唔係邊個冠亞季，而係原來一個騷竟然隨時撮合人氣選手、女子組合Bingo成員Carman同CY！雖然佢哋話仲係了解緊，不過《造星III》原來已經有2、3 Pair情侶，原來男女混戰真係會混出愛火～

當中22歲的Cloud（雲浩影）係大熱之一，人靚聲甜嘅佢，未選完就已經獲睇好，有機會成為新一代實力玉女歌手。不過原來「玉女」已有意中人，佢同男友Ryan 2014年已經一齊，Cloud更加公開大讚男友靚仔，仲得到粉絲力撐登對添。

至於KLAU（劉瑞祈）原來賽前已經同咗有「翻版周迅」之稱嘅KiKi（張凱娸）一齊！2人喺賽前2個月開始拍拖，緣分更係由ViuTV另一個節目牽成！2個一齊玩《造星III》，又被分派到同1組作賽，真係緣分的天空呀。不過亦因為咁，佢哋就有晒頭貼頭合照，可以名正言順做「糖黐豆」，認真Sweet爆！