台上黑面台下攬王浩信　網民封YoYo真正視后

全晚最精彩嘅一幕，唔係龔嘉欣爆喊，亦都唔係白彪High爆講唔停，而係成日被外間質疑同雙料視帝王浩信婚姻關係嘅陳自瑤（YoYo），明明行紅地氈時避談對方，尤其對方公開話要多謝佢時，更變咗做「面黑路人甲」，木無表情，但喺台下就真情流露，主動恭喜對方兼送上抱抱，呢幕即刻引起網民瘋狂討論，個個都狂讚佢夠晒大方得體，更加有網民抵死咁話：「佢先至係真正視后！」網民留言：「成晚最好睇係呢個鏡頭！」、「蔡思貝讓番個視后畀佢！」、「最佳女主角！」、「YoYo簡直係典範，擺低晒所有嘢，大方恭喜夠得體！」、「讚！真係好有氣度！佩服！」

對於老公王浩信獲獎，YoYo受訪時表示：「之前記者問我都有講笑話佢年年都大熱，有獎攞都唔出奇，恭喜佢囉！（佢公開多謝你時，你個樣好愕然？）係呀！可能當時分咗心，突然聽佢咁講。（咩事？）因為開心。（佢好少咁公開講？）之前佢拎獎都有公開多謝我，我都真係有悉心照顧個女，不過點慶祝就未知。（影全家福？）佢有排搞，唔想影響公司進度，同埋我好凍，有啲唔舒服，個人懵懵哋，所以返去先。」稍後YoYo如其所言坐蕭正楠順風車與黃翠如先行離開返家。