胡定欣朝朝食花膠拉麵？陳山聰投訴食「下欄嘢」

藝人胡定欣與陳山聰早前為無綫節目《煮場爭霸》擔任嘉賓，負責出題挑戰「廚神」保哥及Ricky。定欣竟棄「山珍海味」，選擇豬手作今次比併食材，搞到山聰「失望」兼搞笑謂：「點解揀呢樣呢？有鮑魚同魚翅都唔揀喎！定欣朝朝食花膠拉麵，打開雪櫃就係得呢啲『下欄嘢』。」

二人交情非淺，但山聰「投訴」至今仍未有機會試過定欣手勢：「去佢屋企Gathering，次次都係叫麻辣火鍋外賣，可能方便大家坐埋傾偈啩。（佢只係煮畀第時另一半食呀！）我都想佢係咁啦！」而目前正在休息的他，預算過年後才投入新劇拍攝，這段時間湊仔為樂，見證着半歲大的兒子一步步成長，令他大感欣慰。

定欣則解釋只是不想「班門弄斧」：「豹嫂（胡蓓蔚）同山聰太太都煮得好好味，而袁偉豪嘅甜品及咖啡都好出色。其實豹哥（單立文）先最犀利，佢煮嚟煮去都係兩味，但煮極、食極都唔厭，佢仲會為菜式諗啲好浪漫嘅名，好似『星光熠熠蒸排骨』及『情味濃濃鹵水雞翼』咁。」她又自認饞嘴，所以要勤做運動「找數」，才能繼續大快朵頤，這亦是自己生活的動力。