【鬧到喊】容祖兒《浪姐2》被霍汶希狂插  喊晒自責:我做得不夠好!

2021年01月29日 17:47
東網電視
更多新聞短片
內地真人騷節目《乘風破浪的姐姐2》近日熱播,大家都知霍汶希(Mani)有幾錫容祖兒,但節目中Mani連祖兒都鬧,被網友稱佢為「魔鬼評審」!
節目中身為隊長嘅祖兒同台灣女星陳妍希及內地歌手阿蘭一隊,唱跳《歸零》,不過喺綵排時,佢哋表現強差人意,令總顧問Mani狠批阿蘭,直指佢喺3個表現之中最差:「弱的人就真的要好好去(練習)。」估唔到連祖兒都鬧埋一份:「你比較有經驗的人,你去教她們,你自己對自己的門檻這麼低嗎?」隨後兩個即幫口話祖兒有教自己,不過Mani聽完似乎唔多收貨,繼續鬧:「教了你以後,你要自己去練習,才有用的。阿蘭,現在不是證明給任何人看,而是你現在不是阿蘭1個人,你做得不好你就把她們都帶垮。」令整個場面變得沉重,阿蘭更爆喊要隊友安慰,而祖兒喊住自責:「我做得不夠好,因為作為1個隊長,沒有做好自己的本分。」
張栢芝跳舞太好笑
至於張栢芝繼之前唱番自己經典舊作《星語心願》,點知走音,再加上喺跳舞環節失準,雖然佢話對自己好失望,但繼續再接再厲,喺跳唱環節以略為生硬舞姿示人,雖然唱同跳好似唔太協調,但仍帶畀大家好多歡樂,再加上佢同隊友跳唱《理所當然》,表現麻麻,原來佢自爆唔鍾意性感舞風:「我就不喜歡,最不喜歡這些舞蹈,很不張栢芝我想要吐,好作。」「#張栢芝跳舞太好笑了」呢個熱搜,火速喺網上瘋傳,短短唔夠3小時,已經有超過2億網友討論。