東網電視
更多新聞短片
視頻觀看次數: 3.5k
《全民造星III》冠軍、「折骨Ben」趙祥誠俘虜不少粉絲，雖然人氣未及其他組員，但勝出短短日子便瘋狂接廣告，成功賺得第一桶金！多位組員賽後成雙成對，他不諱言也有心動對象，但想多了解才開始。
Ben憑「折骨舞」贏得冠軍殊榮。
賽前冇諗過自己會贏~
到依家仲消化緊呢個賽果。
趙祥誠（Ben）爆冷成為ViuTV選秀節目《全民造星III》冠軍，直言至今仍未能消化賽果，但會繼續做好自己，為獎勵自己半年來的艱苦，賽後他瘋狂打機及相約組員聚會慶祝。
比賽結束至今約1個月，Ben已經接咗大量嘅廣告。
雖然賺到第一桶金，但係Ben唔會亂使~
雖然暫未決定將來走甚麼路線，但他已接下多個廣告，包括雪糕、飲品、服裝、鞋墊及電競等，火速賺得第一桶金！他說：「會畀家人用，我唔使用好多錢，都係買衫同買Game，本身對錢冇咩概念，畀媽咪同讀商科嘅細佬管理，家姐就做經理人幫我處理工作。同埋我本身鍾意打機，入過打機榜頭200名，有人搵我直播打機，都有興趣。」
大部分嘅錢交畀家人處理。
Ben自爆除咗買衫同買Game都冇乜開支。
打機有番咁上下身手，Ben有興趣試吓直播打機。
想玩另類音樂
談到出身富裕家庭，家住獨立屋，母親從商並與萬梓良以「兄妹」相稱，Ben對被起底感愕然：「會諗點解有人知，不過冇咩負面影響就算，媽咪冇乜嘢，都預咗，只係唔想畀人覺得我靠關係。其實媽咪冇講畀親友知我參賽，係報道出咗先知，呢樣我好開心，因為係自己努力嘅成果。」
收埋富家子嘅身份，Ben解釋係唔想畀人覺得佢靠關係。
問到想做演員還是歌手，他透露自小已想做演員，對恐怖片及英雄片情有獨鍾，期望有機會參與，但同時也想出歌：「點都要有自己作品，我想做嘅類型唔係主流，做外國興但香港未興嘅嘢，視Alan Walker、Travis Scott、The Weeknd為目標，因為香港冇呢種迷幻同電子嘅音樂。」
無論將來做演員定係歌手~
Ben都希望有自己嘅音樂作品。
不少組員賽後成為情侶，問到有否拍拖，已單身2年的他大表無奈：「唔好提，依家唔好諗住，因為事業啱啱開始，專心工作先。我有心動對象，但想了解多啲先開始，驚錯，盡量唔影響大家事業為主，對象唔係組員嚟嘅。（圈中人？）唔係啦！」
為免愛錯人，Ben就算有心動對象都要了解清楚先進一步。
