參加《造星Ⅲ》激嬲阿媽!ANSONBEAN重返校園兼顧演藝夢

20210205
東網電視
更多新聞短片
參加ViuTV節目《全民造星Ⅲ》的陳毅燊(ANSONBEAN)人氣由頭帶到尾,雖然最後只屈居第3名,但他已十分滿足,不枉停學作賽。原來他是「學霸少男」,當初媽媽非常反對他停學參加比賽,母子曾一度駁火。他表示2月會重返大學,一邊求學一邊追演藝夢!
現年20歲的ANSONBEAN就讀科大工商管理學系Year 2,他表示選擇讀Business,覺得這科能套用任何事情上:「我對做生意都有興趣,但未知做乜,書本學到拆解市場諗緊乜,覺得好有趣,不過讀咗之後又唔係我想像咁容易,唔係想像咁好玩,哈哈!」初中就讀名校聖士提反中學的他,高中期間有2年往英國讀QE,之後返港考AL試,結果考獲好成績,他說:「為咗返香港,我逼自己讀書,自己想讀就會讀到。(點解逼自己返香港?)因為我想表演,香港多啲機會。」
唔心急追學分
提到其母經營跳舞學校,他謙稱媽咪和弟弟跳舞比他好,母子之間感情極佳,但自爆為了參加比賽,曾與母子駁火:「大家觀念同重視嘅嘢唔同,就駁咗佢嘴!佢覺得我唔應該停學參加比賽,但我覺得值得花時間,可以擺低讀書一陣。不過拗拗吓佢放棄咗,最後佢話好啦,上年9月至12月就停學。(失咗嘅學分點追?)唔使趕,不過都要讀番。(遲過其他同學?)有時唔需要同人比,大家開心就得。(準備好重返校園?)要識番啲讀書朋友,幫吓手,上年識嘅朋友可以幫吓手,畀啲資訊我。」
未夠班教跳舞
問到即將重返校園,可擔心同學對他的態度有變?ANSONBEAN說:「比賽時係少咗見,依家見多咗,冇乜嘢分別,佢哋主要問我之後點同恭喜我。(對你心心眼?)唔會,因為熟嘛,淨係話『正呀』!」再問會否到母親的學校教舞?他說:「可以教人,但覺得功力未夠精湛,未做到一個老師可以教到文化細節,唔想教錯咗,影響跳舞文化。」
Wardrobe : Columbia
Hair:Alex So @ The Attic