【形容係香薰】陳瀅突襲舌吻 嚇親蕭正楠

2021年03月26日 18:13
東網電視
更多新聞短片
藝人蕭正楠與李佳芯(Ali)在將軍澳電視城為無綫新劇《愛美麗狂想曲》宣傳,兩人受訪時互笠高帽,他大讚Ali演繹得夠放,Ali則回敬對方的HeHe角色夠晒乸,入型入格。網友評價蕭正楠與曹永廉的HeHe組合,更勝另一CP王浩信與張振朗,蕭正楠笑說:「咀戲都幾難忘,總共咀咗4次,我都真係幾忍得臭囉。第1次同男仔咀嘴,個feel同女仔唔同,有啲拮囉,同埋要閉氣。」
在戲中有場大露背淋水戲的蕭正楠,笑謂遠不及陳瀅在戲中的性感尺度,他笑說:「同陳瀅場咀戲直情係舌吻嚟,佢喺電光火石之間舔咗埋嚟,佢之前特登唔講喎,搞到我拍完之後呆咗,坐咗喺度,佢真係好麻甩,亦唔係傳統嘅TVB演員,所以都幾有驚喜。」(同曹永廉咀嘴點比?)冇得比,一個係香薰,一個係坑渠,哈哈。」
近日生日的蕭正楠與老婆黃翠如到酒店staycation慶祝,老婆為他請來一班朋友製造驚喜,他笑說:「都好開心嘅,不過我都要交好多戲㗎,佢嘅安排真係錯漏百出,都估到晒。」