無綫再推短劇由胡鴻鈞擔正 《Think Big》主持升呢做女主角

2021年03月31日 13:31
東網電視
更多新聞短片
短劇《香港愛情故事》口碑好,無綫再推短集數劇集,包括林肯、潘嘉德聯手監製嘅《青春不要臉》以及由《降魔的》監製方駿釗打造嘅《愛上我的衰神》。消息竟然從內地傳出,指劇集共10小時,預計兩星期就播完,由於劇情濃縮,故節奏比一般劇集快。內地短劇唔多,繼上次《香》劇於內地影片平台獲得好成績,難怪網民紛紛表示期待。
有指劇集暫時公布4位主角,包括胡鴻鈞、馬貫東、麥美恩及陳嘉慧,當中新面孔嘅陳嘉慧現年24歲,樣貌清純,係兒童節目《Think Big天地》主持,曾參演劇集《迷網》,12歲到日本讀書,畢業於日本櫻美林大學,如今回流返港拍劇,睇嚟新一代宅男女神又誕生!該劇係一個奇幻故事,胡鴻鈞同陳嘉慧分別係兩個世界嘅人,陳嘉慧更每日都會帶畀佢衰運。
胡鴻鈞拍完《十月初五的月光》就緊接四月尾開拍《愛》劇,佢接受東網訪問表示:「我本身劇入面角色都好慘,成日都會唔開心!(又做男主角受公司力捧喎!)有得做自己會畀心機,角色都好有挑戰性,自己要好深深挖出自己心入面唔開心嘅事,但唔開心得嚟要演得有層次,難度就喺呢度!」說到要領導新人陳嘉慧做戲時,他謙稱:「我何得何能,自己都係新人,我老喇!後生可畏,監製搵佢一定係佢有潛質。」
監製方駿釗都大讚陳嘉慧有潛質:「今次有10集,想搵啲新人、新元素配搭胡鴻鈞,陳嘉慧係好有氣質嘅女仔,今次劇中角色係要清純、乖乖女咁,佢又有啲似日本妹,而且佢都唔係第一次拍劇,之前我試過佢好多次戲,佢OK我哋先用佢!」