62歲魯振順有心有力 想搞大女友個肚:可能上天畀我呢!

2021年04月01日 14:12
東網電視
更多新聞短片
藝人魯振順日前接受范振鋒主持嘅新城節目訪問時自爆婚訊!佢話女友比佢年輕6歲,而呢對「黃昏戀」原來早於41年前已結緣,女友係當年歌唱比賽認識嘅女同學,正計劃於疫情後結婚!佢表示獲高人改名為「釋禧」後,重遇對方:「以前唔算有太多交流,好奇怪,喺上年佢睇完我訪問後,了解咗魯振順,原來我係咁慘,又覺得我好真,居然搵番我。」
相信緣分嘅佢,指可能係逝世嘅媽媽安排,佢話:「2017年阿媽走咗,佢叫我好好活下去,點知冇耐女友就出現,連佢(女友)都話可能係阿媽派來陪我。」佢坦言一直恨組織家庭,尤其見到陳榮峻與吳香倫結婚。至於婚禮,佢表示計劃大排筵席,全由女友負責,待疫情完結後舉行婚禮:「佢成日話要幫我爭番口氣,唔好成日都話我係Gay!」
魯振順曾於訪問表示,29歲時向拍拖7年嘅女友求婚卻慘被拒婚,分手後前度更自爆曾為佢墮胎,令佢大受打擊,加上事業不順,佢試過割脈自殺,幸最後將感情事看開,現遇到心目中嘅賢內助。足本訪問將於2日晚凌晨才播出。而范振鋒則表示:「好鬼震撼,聽到時自己都打個突!」
魯振順之後接受訪東網電話訪問表示,自己還未求婚:「我哋好多嘢都心領神會,所以都冇求婚,之後都會做番嘅。(預幾時結婚擺酒?)應該明年年尾左右,要睇疫情嘅情況而定。」談到生兒育女嘅問題,魯振順笑言自己4月尾過埋生日63歲,女友都50多,雖然佢好喜歡小朋友,但明白都比較渺茫,不過都會盡力,佢笑言:「好多嘢好難講,可能上天畀我呢,一切順其自然啦,不過,女友都講過可能會領養。」
談到愚人節公開婚訊,佢話:「咁要多謝范振鋒佢哋,因為我係10幾日前同佢哋做訪問,咁啱佢哋今日宣傳,所以令唔少人有呢個誤會,我都有少少慌失失,女友其實都唔想我咁快講。」至於重遇經過,佢表示41年前認識後,之後大家冇再來往,但女方有Keep住合照,以及留意佢嘅消息,直至母親離世,女友透過梁競徽母親取得自己電話,之後大家再聯絡,對方更曾整水餃畀佢食:「我食一啖已經喊咗,好有我媽咪嘅味道。佢仲話可能係我媽媽派佢嚟照顧我。」魯振順再提供佢同女友嘅合照,見佢女友非常賢良淑德,兩個人攬到實一實,好鬼Sweet!
曾與魯振順合作劇集《多功能老婆》嘅朱晨麗,得悉後亦表示戥對方高興:「佢係個好Sweet、好開心嘅人,另一半同佢一齊日日都會好開心。搵到個伴陪佢度餘生,恭喜先!」而好友楊茜堯接受訪問時坦言不知道對方結婚,但都很戥對方開心,可以找到人生另一半。講到不少人以為他是GAY,楊茜堯說:「身為朋友送上祝福就夠,其他任何嘢唔需要去猜測,希望疫情之後佢結婚我哋都能夠嚟參加就好喇!」
魯振順演活過無數角色,1996年版《笑傲江湖》嘅「東方不敗」、《真情》嘅「唐明」、《十月初五的月光》嘅「徐來順」、以至近年《多功能老婆》嘅「齊名順」都令人印象深刻。佢曾經喺訪問中表示演過電影《天皇巨星》,出街後反應不佳,更被鬧點解佢個角色係天皇巨星,佢表示其實係劇本寫,但嗰種恥笑同奚落絕不好受。