馮盈盈爆唔着衫同男友講電話？余思霆親自澄清

閨蜜最大用途係乜？梗係爆大鑊啦！就好似馮盈盈（FYY）同余思霆咁，盈盈當年選華姐時，被同房余思霆踢爆除剩Bra同底褲喺房周圍行，最後更搞到全裸，2人仲Friend到一齊沖涼添！之後佢哋仲有後續，喺最新一集節目《#後生仔傾吓偈》入面，盈盈舊事重提當年，令到「赤裸事件」再次成為熱話。

盈盈話：「我哋去到後期一齊唔着衫喺房走來走去，佢（思霆）夜晚要同當時男朋友Face time，佢都會叫我喺廁所唔好出嚟住，我問佢做咩，佢話：『你又冇着衫，我Face time 緊，你着番衫先！』。」照咁推斷，思霆當時好大機會係同前男友裸聊，而思霆當時嘅男友，應該係已拆夥嘅天堂鳥成員歐鎮源。

而身在台灣嘅余思霆接受東網訪問時澄清「赤裸事件」，佢話：「其實我個人比較保守，唔會喺人哋面前唔着衫，當時冇着衫嗰個唔係我。」

好多網民都話盈盈同思霆同樣係選美冠軍，但星途就大不同，依家盈盈有劇拍、有主持做之餘，仲成為話題女王。反觀余思霆就去咗台灣，唔知幾時返嚟呀！

----------------------------------------

經典不厭百回看，想重溫過往娛圈經典人與事，繽FUN專題嘅「回帶」一定幫到你！