向林奕匡取經!樂壇新人區子琳恨唱Live

20210418
東網電視
更多新聞短片
歌手區子琳係陳柏宇及林奕匡師妹。
歌手陳柏宇、林奕匡(Phil)嘅師妹兼女新人區子琳(Paula)近日推出首支派台歌《怕甚麼》,受訪時話成為歌手派歌嘅心情既驚喜又驚慌,開心有作品面世嘅同時,都擔心唔知大家聽完新歌有咩反應。佢又話完全冇諗過會加入香港樂壇呢個大家庭:「甚至冇諗過自己會喺2021年出到第1首歌,非常之期待去唔同嘅平台宣傳,如果有得唱埋Live就梗係最好啦!始終唱Live同播歌係唔同,唱Live嘅話可以同觀眾近距離互動、呈現到自己唔同嘅一面,加上自己係比較鍾意現場演繹,出道至今都仲未有機會唱到Live。」
問到會唔會向師兄、師姐們取經?Paula笑話有:「之前有同師兄Phil合作過,嗰時佢都有分享啲唱Live嘅技巧、同埋Rehearsal應該要點做。(想同邊位歌手合作?)今年見到好多新人出道,合作嘅話希望可以同到唔同嘅新人Crossover唱歌,呢個自己都好期待。」