連環爆負面新聞!林凱恩冇被打沉:代表我有價值

2021年04月29日 23:08
東網電視
更多新聞短片
藝人林凱恩今年接二連三爆出負面新聞,最近更因哥哥拖欠薪金兼失聯,令她再度成為新聞人物。不過樂天的她認為有價值才有新聞,並以茶葉蛋作比喻,指人生有裂痕才有味道。
林凱恩在劇集《愛美麗狂想曲》飾演千金小姐「藍嵐」,角色帶點傻氣,跟《愛‧回家之開心速遞》的「Bonnie」反差甚大, 惟她笑言其實是做自己:「Bonnie係好嚴肅、好精靈,而《愛美麗》成個感覺好放鬆。(畀自己幾多分?)65分,我對自己要求好高,其實《愛》劇都係做自己,一樣咁蠢,其實我唔叻!」
有報道代表有價值
近年林凱恩曝光不斷,但是非亦接踵而來,繼之前爆出性感照,其室內設計師哥哥又被指拖欠裝修工人薪金並失聯,可是她並不覺得自己「黑仔」,反而認為自己有價值才有新聞:「我成日都覺得『欲戴王冠,必承其重』,你有你嘅價值,啲人先會留意你、去關心你,如果大家係唔care,都冇必要去關心我。某程度我都覺得係好事,做公眾人物多數都畀最好一面大家睇,我知道世界係好殘酷,但最緊要係用咩心態去處理。」
感恩被愛包圍
面對突如其來的負面新聞,她覺得是一個成長階段,更以茶葉蛋比喻人生:「有裂痕先有味道,如果太順利,就唔可以好好感受呢個人生。好開心愛我嘅人真係好多,明白其實係要靠自己,有好多事要面對。(自己面對好辛苦?)我唔開心會搵人傾,一定會講出嚟,好感恩喺我媽媽身上學到點樣去釋放負能量。(對上一次喊係幾時?)喺我嘅戲劇世界喊囉,就係我其中一個宣洩渠道。(唔會匿喺房喊?) 唔會啦!瞓覺好過,要面對嘅嘢始終要面對,喊完會眼腫,所以都唔係咁好。」