頭髮都唔甩多條超型!謝霆鋒教你Chok住摘菜

2021年04月30日 11:01
東網電視
更多新聞短片
叫得做Chef Lemon,謝霆鋒當然靚仔兼chok得,仲要係廚技勁,佢網晒入廚短片,唔係教大家今日煮乜餸,而係教摘菜都一樣可以chok,一樣可以型!佢拎住條迷迭香,話逐條逐條搣,好浪費時間,所以教大家點樣用隻叉,快而準咁一下過全清,仲話呢個方法對有強迫症嘅人特別覺得治愈。
示範時,Chef Lemon第一次有失準,可能太chok關係,搞到條迷迭香都chok斷埋,到第二次完美成功示範,仲要補個chok樣加電眼,都咪話唔攞晒分!唔少網友狂讚霆鋒超型,但同時話發覺佢老咗唔少,但又話老得嚟依然男人味爆燈,仲反問佢點解頭髮都唔甩條,髮線依然冇後退之餘,仲話好想睇佢同女友王菲一齊下廚。
霆鋒廚技勁之餘,口技一樣出眾,有唔少網友近排翻loop佢早年喺內地節目中,狂講英文、日文、泰文、普通話、廣東話同法文嘅短片,6種語言不斷切換,令現場觀眾大開眼界。霆鋒話細個喺加拿大讀書時一定要讀法文,媽媽狄波拉喺泰國出世,跟住被上海養父領養,所以喺媽媽身上又學識泰文同上海話,加上曾經喺日本流浪,所以又識啲日文。