蔡宛珊旨呈巴士牌Fail　揸上癮考埋電單車

ViuTV真人騷《學神出沒注意》早前播出，除咗前新聞主播陳嘉倩「P牌仔」出沒成為馬路炸彈外，藝人蔡宛珊及樂隊享樂團主音旨呈亦挑戰揸巴士，前者雖然擁有18年駕駛經驗，但對學揸棍波大巴嘅佢絕對係新挑戰，期間不停驚青尖叫又經歷死火，場面蝦碌搞笑。

節目已播影完畢，二人依然堅持學揸巴士，尋日更齊齊應考，可惜旨呈臨場失準，蔡宛珊亦遇突發情況，最後兩人齊齊Fail。近日為戚其義新劇開工嘅旨呈，原來趁拍劇休息時間來應考，自責未有早向劇組請假練習及考試，結果未如理想，仲話Fail喺從冇失手過嘅「三手軚掉頭」，直言太緊張所致！

而蔡宛珊泊位、開車全冇問題，回程路上不幸遇到突發情況，巴士塞住路口同時又轉燈，手忙腳亂之際停咗喺路中間。雖然二人未能一take pass，但再接再厲會再重考，早前更相約去學電單車，10月考試，睇嚟兩個學車學上癮，希望下次聽到好消息！