Cookies出身！鄧麗欣睇MIRROR騷感觸到眼紅紅

歌手鄧麗欣（Stephy）當年以組合Cookies出道，至今已經19年，近日MIRROR人氣急升，令人燃起對香港組合嘅期望。Stephy身為「大師姐」，原來佢都有去九展睇MIRROR演唱會，佢喺社交網晒後台合照，仲留下感言添！

對於今次MIRROR騷，佢留言：「完show後很多人說我眼睛紅紅的，除了可能現場氣氛震爆咗啲微絲血管之外，其實我真的是被你們感動了，一場精彩又感人的演唱會，精彩的地方應該不用說，至於感人，是看見你們的努力沒有白費，是看見你們每一位都擁有屬於自己的光芒，是看見你們互相之間的真實情感，感謝帶給我們一場這麼精彩的表演！」唔少網民都話希望將來Cookies可以同MIRROR搞Crossover，但大前提係Cookies要集齊所有人非常困難囉！

另外，廿四孝爸爸古巨基都有「出關」！基仔之前為咗囝囝，曾經「隱居」近一年，直至近排先開始間中蒲頭，估唔到MIRROR吸引力如此大，基仔都忍唔住要睇騷支持！基仔喺社交網晒出合照，見基仔安全至上，合照時都戴住口罩，佢留言：「從素人開始，短短兩年多的時間，能做到這種壓台感和高質演出，是要花多少倍的汗水和努力才能做到。謝謝你們為樂壇的摩打加入了新電池。滾動。加油。」