「YOLO女」Smiley曾患免疫系統病:高燒半昏迷

2021年05月15日 13:53
東網電視
更多新聞短片
直播平台旗下人氣主播Smiley(敖可凝)、kk(關佩姿)及阿Lu(崔可迪),位位都有過人之處吸引粉絲,其中台柱Smiley坐擁近10萬粉絲,識彈結他、唱歌及作曲,近排學埋打碟及跳舞,之前更是ViuTV節目《YOLO的練習曲》女團成員之一。原來讀航空服務的她去年畢業,但撞正疫情,空姐失業,碰巧此平台接觸她,故就有此嘗試:「多個平台畀我接觸多啲人,表現自己。」
但講到她在10年前患上罕見的免疫系統病,她表示當時幾嚴重:「高燒到半昏迷,嗰時因為要休學,所以嘗試接觸音樂,但嗰時甫片冇出樣,因為食藥影響外觀,食咗5、6年高劑量類固醇,一日要食12粒,搞到個樣好腫、好多暗瘡,好冇自信。」她坦言當時被同學網絡欺凌:「佢哋會講『咁嘅樣就唔會甫自拍啦』、『你整容失敗呀,點解返嚟唔同咗樣嘅』,嗰陣好唔開心,朋友又唔多,唯一心靈慰藉就係音樂。(依家有咁多粉絲威番畀佢哋睇?)唔會,我覺得自己要做得更加好,因為對自己要求高,做唔到目標唔死心,仲有好多進步空間。」她亦謂現時病情叫做穩定,只要不復發就得,亦已不用再食藥。
而阿Lu之前就以組合Myar出道,但期間打了5、6年官司,到最後組合亦解散。他曾參加《全民造星》,除了憑唱歌跳舞吸引粉絲外,直播又玩埋幫人占卜,解除疑難雜症。而他近排亦推出了新歌《Never Look Back》,希望不要被之前不開心事框住自己,重新出發:「我成日好depressed(情緒低落),之前組合時唔知做緊咩,做緊嘅嘢又唔係自己最想做嘅,但依家入咗間音樂Label,音樂風格係自己想做嘅嘢。」
至於kk除了幕前工作外,平時亦會兼職教瑜伽及幫人補習,原來她是讀中文教育出身,但就沒有選擇做老師:「因為鍾意幕前,同埋我教書,我都會同學生講讀書只係其中一條路,想幫學生發掘自己條路。(家人支持你做幕前?)有畀家用就得,哈哈。」
講到不少粉絲會課金,他們就謂自己與粉絲是「講心不講金」,阿Lu表示:「睇直播fans會覺得好似同佢交流,但我啲fans好犀利,喺我生日時會整個廣告板喺尖沙咀,好肯幫助我哋。」kk亦開心粉絲是真正欣賞自己:「會覺得你真係唱得好聽先會留喺度支持你,甚至我出面有其他拍攝工作,佢哋都會支持埋。」
場地:紅堂