撩女開波對話曝光？森美勸「出軌安」Edan：要謹慎啲

人氣男團MIRROR除咗姜濤外，成員Edan（呂爵安）近日都人氣急升，因為形象討好，連森美個女都好鍾意佢，仲被森美改花名做「女婿安」。不過網上有人爆料指，其舊愛喺社交網踢爆Edan曾出軌，女婿安驚變「出軌安」，唔通好似許志安咁，逢安必係壞咗嘅人？被指係Edan舊愛嘅Stephanie原來24歲已經成為人妻。有網民仲喺社交網貼文Tag咗Edan，希望佢會為舊愛結婚感到開心。

但Stephanie就話：「不如尊重埋我，其實戴完帽都唔會想理佢感受！」不過Stephanie之後又好快刪走留言，但已被網民Cap圖。事件網上愈傳愈盛，討論區有人更公開疑似Edan喺社交網撩SP嘅對話截圖：「想磨下」、「想一啖食咗你！」內容相當露骨。

而Stephanie嘅回覆亦似乎暗指Edan出軌，有人私訊佢，鬧佢博上位，但Stephanie就話：「自己送上門，我係唔會留手的，我好惡，把口好爛，唔好試我底線！」

事後，Edan亦喺社交網發文回應事件，指對私人感情事不作澄清，並希望大家停止對牽涉其中嘅相關人士騷擾，佢表示：「知道有關自己嘅事情被討論中，私人同過去嘅感情事我認為我唔應該作出任何澄清或回應，因為我唔希望會影響任何人。希望大家畀多啲空間事件中嘅人，停止對佢（or佢哋）嘅騷擾。我自己亦會繼續專注喺我嘅工作上。感謝大家。」但就未有交代對話截圖嘅真偽。

而Stephanie喺Edan發文後，極速回應：「要講嘅佢講晒，其實各自開始咗新生活，唔希望再有人專登嚟提起，未來見一個del一個。」

森美之前曾代愛女捧Edan場，仲稱呼呂爵安為「女婿安」。對於「女婿」遭前度女友爆讀大學時「出軌」，森美受訪時表現愕然「嘩」了一聲，話人哋嘅事唔關佢事，但又關心Edan有何解釋。問到會唔會對「女婿」扣印象分？佢錫住對方話：「咁又冇喎，做人要睇長遠，唔好望番過去，不過做藝人就要謹慎啲。」

而阮小儀就表示：「我唔知詳情，如果從旁聽，都係發生喺佢讀書年代，講真佢得嗰20幾歲，個個年青嘅時候都拍好多次拖，我都拍唔少啦，呢啲正係年青象徵。」又覺得出軌只係憑留言去揣測，覺得唔可以咁武斷，展望將來先係最緊要！