「廈門林志玲」失威！Live濾鏡消失　真身係馬思純？

20210619
  • 東網電視
    更多新聞短片
    網絡照騙成日有，呃吓Like收吓禮物都好小事，但點估到原來原來坐擁超過488萬粉絲嘅「平台第一美女」、有「廈門林志玲」嘅女網紅都係「騙案」，搞到宅男心碎，真真正正係「生靈塗炭」！
    24歲大陸正妹網紅「迅猛龍特蕾莎」網上迅速爆紅，就係因為佢擁有一張號稱「冇加工」嘅索爆靚樣，加嬌滴滴嗓音，一直被網友視為短視頻平台最正網紅，更獲賜「廈門林志玲」美名，靚樣似乎有晒品質保證。
    不過近日迅猛龍特蕾莎就同另一位男網紅開Live，影片中佢潮玩「花手」舞蹈，點知佢纖纖玉手一轉，個美顏濾鏡亦跟住轉，轉到連佢真樣都曝光埋，對眼立即變細，額頭又凸出，反而更似內地影后馬思純！而判若兩人嘅佢更似乎唔知情，點知呢1秒鏡頭，都足夠令網友震驚，瞬間Cap圖並鬧爆：「良心不會不安嗎？」
    其實阿特蕾莎早年曾自稱「關掉美顏濾鏡」，以「真身」示人，當時佢因為嬲爆網友質疑佢個樣曾「人工調整」，因而表示豪氣閂Filter開Live，又放手指喺面旁，表示手指冇變形去「證明」Filter已關，更試過卸晒妝咁見人，點知…原來都係一個驚天大騙案。
    ---------------------------------------
    世事如棋局局新，娛圈熱話數之不盡，唔想Out、唔想同班Friend冇話題？就一定要留意繽FUN專題嘅「熱話」喇！