王浩信第4人格將出現 大講馬來西亞話靠死背

2021年07月16日 19:01
東網電視
更多新聞短片
無綫劇集《刑偵日記》的一眾演員王浩信、戴祖儀(Joey)、陳煒、菊梓喬、王菲等,今日(16日)到電視城為劇集造勢。主演之一的姜皓文因現身在澳門隔離未能到場支持,但仍好有心錄低打氣片段,最後特別點名多謝惠英紅,因對方給予他很多演戲意見。
眾人還即席宣布下星期開始為配合東奧直播,劇集將延遲45分鐘至晚上10時15分播出,同時,又宣布劇集於多個內地網上平台收視奪冠,更有網民提議開第二季。活動後王浩信跟戴祖儀「兩兄妹」受訪,前者對遲到大半個鐘感抱歉,指因為現時正趕拍另一套劇,直至早上才收工,講到下周開始延播45分鐘,問到會否擔心收視再下跌?他直言應該支持香港運動員:「係4年一度嘅盛事,一定要睇直播嘅,而我都相信觀眾會好體諒、支持我哋,或者去其他平台翻睇。」
王浩信透露劇中角色第4個人格將出現,更自爆會大講馬來西亞話,大呻好難:「拍嗰時每日秒都死背,希望馬來西亞嘅觀眾聽得明。(有冇搵老師惡補?)冇呀!監製搵當地朋友錄咗段聲帶畀我,真係靠背,係情詩嚟嘅。」對於有內地網民話想睇第二季,他直言都好想開拍,特別想原班一齊上陣:「希望觀眾唔好驚咗我哋,怕太沉重,延續都會係咁多人格。」
至於講到Joey被大讚演技大爆發,她直言收到讚賞好驚喜亦好開心:「一開始係好緊張,始終自己演出經驗唔多,但要處理一個情緒起伏咁大嘅角色,好彩旁邊有好多勁人傍住,令我技能爆升!」王浩信都不禁加把口大讚:「何止滿意,直頭係驚喜,作為新人演戲都會勁大壓力,啱啱入行就同Liza姐(汪明荃)合作,手都震埋㗎!但佢冇震,仲演得好!」