螞蟻腰點樣練?千年一遇空姐力戰爆肌高Ling連詩雅

20210725
東網電視
更多新聞短片
近年因為疫情影響,大家入外出多做運動成風氣,女士們更加係重點操腰,咩兩星期練出腹肌Challenge做到厭,近排大家就轉玩螞蟻腰,即係介於19至23吋之間嘅腰圍,估唔到「一腰百應 」,當中被日本媒體稱為「千年一遇空姐」嘅台灣網紅高鈺雯(Rita),曾被傳過係羅志祥眾多「豬女郎」之一,擁過百萬粉絲,佢就最鍾意大晒佢條螞蟻腰及長腿,早前佢晒出多套比堅尼靚相,獲網友大讚「比傳說中的美人魚還美」!
唔好以為台妹特別索,其實本地「佳麗」都一樣煞食,好多更加係港姐出身,睇嚟真係「實力」保證!就好似早前成功挑戰漫畫腰嘅高海寧咁,佢就一於「收起」34D咪咪,轉晒纖腰,成功練出腹肌嘅佢,近排都係咁晒自己條腰,不過網友都一樣睇得好興起,大讚佢應大則大!
2003年參選港姐入行嘅李施嬅,雖然已經4字頭,不過佢都一樣操到腰仔好似少女一樣,見佢個社交網時不時上載超高難度嘅瑜伽倒立Pose,就知佢咩料啦!最鍾意玩「人體奧妙展」嘅佢,耐力驚人,喺酒店隔離都仲可以只用雙手貼住床做支撐,再用腳尖掂住梳化,真係似足「X-MEN」。
瘦底嘅馮盈盈,由參選港姐嗰時就已經弗到爆,明明瘦到見胸骨嘅佢,條小蠻腰就當然唔使講,最難得係佢依然可以成日都喞出小峽谷,原來佢係靠落力舉鐵而擁有令人羨慕嘅完美身段,佢嘅目標仲係要操出蜜桃臀,到時有前有後,咁就真係名副其實嘅螞蟻腰。
講到香港操腰代表,就一定唔少得歌手連詩雅(Shiga)!話佢係做Gym達人就一定唔過分,事關早前佢因為網友一句「好似唔夠乾身喎」,佢即刻發奮猛操,搞足3星期增肌計劃,操到排「朱古力」粒粒分明,就算放假喺屋企都狂做運動,佢仲開心Share練腰心得,話每日只需10分鐘就可以擁有「川字腰」,大家要學嘢喇!
----------------------------------------
無論Keep Fit定美容,永遠都係潮流熱話,想知道最新最潮,又或者係奇怪偏方,只要留意繽FUN專題嘅「至Fit」,天下間咁多收身美容方法,總有一種係適合你!