迪麗熱巴新劇8億點擊係造假？網友呻打機被迫睇劇！

內地當紅花旦迪麗熱巴夥拍內地男神楊洋嘅劇集《你是我的榮耀》由7月26日播放至8月2日大收旺場，累計播放量快衝破8億，不過同時惹嚟播放量造假之嫌！事緣有網民喺網上爆Seed話，部劇有同某電玩遊戲合作，所以喺頭幾集中，有好多劇情都係圍繞電玩，而該劇嘅播放平台為谷爆播放量，就要玩家喺打機時，加咗個睇劇5分鐘嘅「任務」，變相要打機就要睇劇。

自稱唔想睇劇、但又要玩手遊嘅網友，就話覺得好「嬲豬」，更質疑《你》劇逾億嘅播放量造假：「不知道這部劇多少播放量是由遊戲玩家刷出來的！」不過另有網民就覺得完成「任務」係悉隨尊便，唔好講到迫迫聲咁難聽，兼且又認為嗰5分鐘睇劇時間，又實質幫到部劇嘅播放量有幾多呢？

另外，仲有人懷疑嗰位「玩踢爆」嘅玩家，可能係另一電玩商嘅抹黑手法，所以先發起抵制行動。仲有網友話玩呢款電玩時，唔見要有睇劇「任務」喎，覺得有人無中生有囉！啲網友好似「維園阿伯」咁喺網上拗餐死，而兩位主角未有就是非回應。