冇怪陳約臨！張家朗被爆七大擇偶條件

香港「少年劍神」張家朗為香港摘下暌違25年嘅奧運金牌而一夜爆紅，現時已離開日本於深圳隔離嘅佢，相約「花劍四子」中嘅隊友張小倫、童星出身嘅吳諾弘，以及身在香港嘅劍壇「花美男」崔浩然，齊齊喺開直播傾偈。期間眾人重提無綫主持陳約臨「花癡式採訪」張家朗而被全城鬧爆一事，起初張家朗避談，隊友張小倫即代為解畫，大讚陳約臨親切：「其實佢好好人，嚟到嗰幾日都有搵我哋做訪問，佢係興奮啫，我之後都有message佢話其實好小事。」張家朗即不停點頭和應，並表示：「我都覺得唔係咩大事。」表明沒有怪責對方。

另外，有網友問到張家朗的感情問題，被指已與前港單車運動員、現為Now TV主持奧運的馬詠茹分手的他，親認現時單身，吳諾弘即起哄大爆其擇偶條件：「要高、要乖、要對佢好、要孝順、對佢父母好！」張小倫再接力大爆：「仲有一定要唔好煩佢囉﹗同埋要好支持佢﹗」張家朗就笑指：「你講晒全隊人要嘅條件喎。」