糖妹練武尋寶!江嘉敏預告剷青挑機龔嘉欣

20210805
東網電視
更多新聞短片
無綫監製陳維冠將於9月開拍新劇《四十二章經》,據知劇情會講述「四十二章經」輾轉間出現於香港,一班演員齊齊搵寶藏,期間發生很多激鬥,故都有不少動作場口,題材搞笑得來又帶點緊張。
而劇中男女主角為陳豪及龔嘉欣,其他演員有周嘉洛、江嘉敏、糖妹、鄺潔楹、譚凱琪等。戲內江嘉敏將有突破性演出,以男人頭「剷青」造型示人,更要打到飛起,實行向馬來西亞視后龔嘉欣《殺手》一角挑戰,對她來說挑戰甚大。至於糖妹雖然身形矮小,但偏偏是武藝高強的高手,現時劇中演員正練功夫,個個練到手瘀腳瘀。
地獄式減肥
江嘉敏接受東網訪問時坦言:「好擔心呀!我要剷青,未試過咁短頭髮,我諗個頭要剷到好似龔嘉欣《殺手》入面咁,都驚塊臉到時會脹卜卜,所以依家地獄式減肥,節食加做運動,不過成績好好,我條腰已經瘦咗3吋,依家21吋腰,但都要努力。」而糖妹現時每日都Keep住跟教練健身,相當勤力,監製亦特意安排了不同的練功班包括吊威吔班給他們,糖妹已經吊到周身瘀傷。
至於憑着《殺手》勇奪馬來西亞視后的龔嘉欣,3年前拍攝時已打到遍體鱗傷,雖然已有「底子」,但嘉欣都不敢鬆懈,她說:「今次都要打,依家每星期都要上拳腳、兵器同威吔堂,本來威吔堂冇預我,係我自薦去上,因為拍完《殺手》都已經過咗一段長時間冇打,我都希望自己可以再有突破,所以要加緊練習,瘀傷方面我都已經習慣晒。」
周嘉洛兩邊拍都OK
現時正趕拍劇集《痞子殿下》的周嘉洛,表示很妒忌眾女可參與打戲,他說:「其實我都好想同佢哋一齊練,自己一路都好恨拍打戲,但未有機會。(《痞》劇唔使打?)唔使,呢套講我唔識武功,剩係畀人打,不過畀人打都要有技巧,畀人打得多我都變咗有經驗點去打人,我喺《愛‧回家之開心速遞》都成日畀人打,好有經驗。」說到有排都返不到《愛》劇劇組時,他即說:「唔知呀!等公司安排啦!我都好掛住佢哋,但佢哋又好戥我開心。(兩邊拍得唔得?)我OK呀!我唔瞓覺都得㗎!而陳豪說:「自己都好期待同一班新演員合作,希望能夠擦出一輪新火花。」