【郭富城歌詞成座右銘】MIRROR金句王!Alton其實好吹得

20210807
東網電視
更多新聞短片
MIRROR成員唔少都係低調派,除咗年紀最大、暖男代表及顏值擔當嘅Frankie(陳瑞輝),其實細佢1年嘅Alton(王智德)都係漆黑中嘅螢火蟲!現年31歲嘅Alton本來係健身教練,雖然參選《全民造星》只係打入最後30強,但成功吸引花姐注意,獲選做MIRROR其中一員,令佢感動大喊!
喺參選中,Alton表演跳舞,大晒招牌肌肉令一眾女評判及主持為之瘋狂,而喺第2次選拔賽中,佢跳唱天王郭富城歌曲《木偶襲地球》,雖然表現一般,但佢最後哽咽講咗歌中兩句歌詞「尋求無悔真生活 路漫長也靜候」,往後不斷被翻Loop,仲成為咗隊中嘅金句王,口才了得,令佢獲安排喺演唱會上表演7分鐘棟篤笑。喺呢段表演中,Alton自嘲存在感低,又曾被家人問係咪退咗團,仲表示一直唔明自己點解可以入選MIRROR,而花姐就話係因為佢有感染力,好有正能量可以感動觀眾。而最後佢淚灑舞台,感性表示:「條路好崎嶇,一路行嚟唔容易,但我知道,因為有你哋。人生就係要堅持,先去到目的地。」令全場又喊又笑!
雖然佢曾自嘲冇Frankie咁靚仔,但口才好、轉數快、好精靈又玩得,曾經喺綜藝《考有Feel頭冚Bra,連一向高要求嘅鄭裕玲(嘟嘟)都曾公開喺電台大讚佢喺演唱會上嘅表現,估唔到佢咁Talk得!佢仲試過將姜濤首代表作《蒙着嘴說愛你》改詞「Oh Baby, I'm so poor. 今個月入不敷支 生活在救助裏 我仍然入不敷 給經濟援助也好 我戶口乾枯 全憑債務貧窮堅持 還有阿媽的照顧」,夠晒頂癮抵死,唔少網民都話希望公司可以畀多啲機會佢發展所長,期待佢之後嘅表現呀!
----------------------------------------
世事如棋局局新,娛圈熱話數之不盡,唔想Out、唔想同班Friend冇話題?就一定要留意繽FUN專題嘅「熱話」喇!