聲夢騷︱炎明熹自爆緊張到爆鼻涕 冼靖峰緋聞被擺上枱

20210813
東網電視
更多新聞短片
一連四場的《聲·夢飛行FIRST LIVE ON STAGE》,昨晚(12日)假旺角麥花臣正式開鑼,無綫主席許濤、副總經理曾志偉、高層樂易玲、星夢老闆何麗全、一眾應屆港姐以及「國民初戀」姚焯菲(Chantel)父親等現身支持。個唱開始前已有大批Fans聚集於館場外,一樓擺滿Fans對15名「聲夢」學員的應援物,如大型花牌、易拉架海報等,其中「人氣王」炎明熹(Gigi)、何晉樂(Rock)及張馳豪(Aska)更特別有人形公仔氣球擺設,以Aska的最為大型。
甫開騷「聲夢」全體學員着回MV造型逐一出場,打頭陣唱出主題曲《造夢時學會飛行》,兼帶來快歌《全身暑假》,聲夢節目主持人森美以嘉賓登場助興,感觸表示見證眾學員的成長之路,深覺在娛樂圈打滾承受巨大壓力。
首位獨唱學員的是冼靖峰(Archie),唱出《我懷念的》,又再孖好友Rock合唱《怎麼捨得你》,唱畢二人互相「廝殺」,問Fans覺得他們可有不和,即使現場有人大叫「有」,但Archie表示沒有,更玩爆料:「有日我哋入廁所傾偈,同一個廁格⋯唔係!同一個廁所,話導演唔鍾意我哋,因為我哋唱歌個樣好猙獰同醜樣。」隨即大螢幕Show相力證,先有Archie的演唱相,Rock笑說好佩服對方唱歌時鼻窿大過口,Archie急解釋是角度問題,低抄鼻窿自然大,輪到播出Rock洋相時,Archie則笑他:「佢唱歌一定瞇埋眼,擘大眼就唱唔到,依家就畀你唱首歌平反。」Rock緊接帶來《笑忘書》。
鍾柔美(Yumi)、文凱婷(Aeren)及詹天文(Windy)各自獻唱完跳唱歌後發言,Aeren自爆參賽後由「鐵甲人」變成識扭動的跳舞人:「我有脊椎側彎,做過手術,背脊成條鐵咁,扭多啲扭番出嚟。」Yumi取笑二人同時都多了個緋聞男友,因Windy及Aeren分別跟Archie及「火雞」孫漢霖(Steven)傳緋聞,Aeren撲出叫Yumi收聲:「緋聞即係假㗎啦!唔係真!」及後齊帶來《跳舞街》。
輪到「國民初戀」姚焯菲(Chantel)出場獻唱「成名曲」《戀愛預告》時,獲全場Fans拍手歡迎,另孖導師JW(王灝兒)合唱《矛盾一生》及《逃生門》,Chantel更帶來小秘密:「其實JW唔鍾意佢被叫大JW、我叫小JW。」JW和應笑說:「我哋年紀睇落差唔多!」引全場發笑!而另一導師泳兒則同冼靖峰合唱《我的回憶不是我的》。
「人氣王」炎明熹成壓軸出場的學員,先後帶來《Bad Romance》、《愛情陷阱》及《沒有你還是愛你》,大騷長腿的Gigi即使跳唱完氣也不喘,笑言:「大家都知我唔係好識講嘢,但當我知道要講成2分鐘嘢,我好崩潰!」故她特意準備了一封信封去感謝Fans支持。
去到Encore環節,「聲夢四小花」Gigi、Chantel、鍾柔美(Yumi)及詹天文(Windy)跳唱出韓文歌《How You Like That》及《Chotto 等等》炒熱氣氛,充滿青春活力!最後15名學員合唱《拼圖》,為首場個唱畫上完美句號。
騷後Gigi孖Archie受訪,前者謂出場前緊張到抖唔到氣:「突然有好多鼻涕,清潔完個口又乾,好彩中間可以飲啖水。」致謝信花了幾耐時間寫?她笑說有一段時間都難以落筆,最後要上網搵「軍師」幫手:「參考其他人點寫,再加自己嘅想法,有幾句喺社交平台都有Post過。」並講到身在內地的父母透過網上直播睇騷,騷前更Sweet爆Send短訊打氣:「女兒加油!爹哋、媽咪支持你!」
Archie亦大讚對方表演好好,惟自覺自己可以做得更好:「始終都係第一次面對觀眾、喺咁大個場館演出,狀態都會打少少折扣,但自己好Enjoy、Hyper。」笑說跟詹天文(Windy)的緋聞再次被擺上台,他大方指不介意:「冇乜所謂,係稿嚟嘅,綵排嗰陣講過好多次,聽到冇感覺,係假㗎!」再自爆其實開騷甫出場曾一度感動到想喊,幸好即時收回情緒:「唱主題曲嗰陣好有歸屬感,但知道一喊再唱就瀨嘢!會忍住到尾場,咁先矜貴!」