王灝兒劇接劇　開心拍《痞子殿下》賺咗幾段友誼

歌手JW（王灝兒）現身會展欣賞時裝匯演，以Deep V加露腰白色裙現身，大騷減肥成果，受訪時她興奮指今次是自拍完古裝劇《痞子殿下》後的首個公開活動，終於可以不用向劇組度期請假之下賺外快：「不停咁嚟都冇所謂㗎！《痞》都拍咗4個月，拍到最後真係有少少中暑嘅感覺，但係一個好開心嘅體驗。」她表示拍劇亦賺了幾段友誼，除了同陳瀅、周嘉洛及朱敏瀚熟落之外，還有張頴康、小寶等，問到有否關心張頴康太太麥雅緻的爸爸突然離世一事？她說：「有，我哋一知道個心都好唔舒服，因為係件不幸同埋遺憾嘅事，有即刻Send Message慰問佢哋。」

JW透露月尾又會再投入劇組「懷抱」，參演由「聲夢」學員主演的青春新劇《青春本我》，將會飾演訓導主任，而角色會偏向輔導一面，不會太惡，對於再度同學員合作，她指好開心，同時因為今次是時裝劇，可以扮靚靚不用着古裝捱熱。問到剛向男友交人，轉頭又要拍劇，男友可有詐型？她冧爆話不會：「我好享受拍劇嘅過程，而佢好支持我！有時佢知我拍完未食嘢，會煮嘢畀我食，非常支持我！」