《聲夢》緋聞男女 文凱婷孫漢霖合體拍MV

2021年09月21日 23:01
東網電視
更多新聞短片
無綫歌唱比賽《聲夢傳奇》成功捧紅炎明熹(Gigi)、姚焯菲(Chantel)及鍾柔美(Yumi),Gigi率先跑出成為首位推出個人單曲《真話的清高》嘅學員,而Chantel、Yumi、詹天文(Windy)則以女團姿態,唱過兩首兒歌《夢》同《Hands Up》。至於其他學員,雖然暫時冇佢哋咁好際遇,不過唔代表佢哋齋坐等運到,近日文凱婷(Aeren)、「火雞」孫漢霖(Steven)、潘靜文(Sherman)同張馳豪(Aska),就翻唱咗戴祖儀同涂毓麟嘅合唱歌《我們再不講再見》,仲分組拍咗兩個版本MV添!
雖然冇唱片公司揼本支持,但佢哋個MV嘅製作,真係有專業水準,唔係求其喺Studio拍完就算。佢哋除咗出外景拍攝,MV內容仲有故事性,當中Aeren同火雞呢個合唱版最吸睛,因為佢哋之前被傳撻着咗,緋聞男女合唱情歌,當然有睇頭,難怪觀看次數已衝破6萬!
好多網民狂讚Aeren同火雞喺MV中好合襯,兩把聲好夾,又覺得Aeren靚咗,同埋唱功大躍進,呢個翻唱版本同原唱版一樣咁好聽,又有網民特別討論佢哋喺MV最後一個互望鏡頭,好有戀愛味道,猛話唔知佢哋係咪終於擦出愛火花、唱出真感情!