袁詠儀恨收20卡鑽戒做結婚周年禮物　張智霖反應係…

藝人張智霖（Chilam）同太太袁詠儀（靚靚）係圈中模範夫妻，佢哋日前夫妻檔拍住上喺內地出活動，受訪時當Chilam被問到最近忙緊咩嗰陣，佢第一時間就話：「忙住買嘢囉！」暗指靚靚成日買嘢！出名鍾意Shopping嘅靚靚即刻笑笑口解釋話：「因為我好多時候都係負責採購嘅工作！」

提到佢哋結婚20年，問Chilam有冇送咩禮物畀靚靚，佢即扮聽唔到，相當搞笑！但係靚靚當然唔會放過呢個機會，開口話睇中咗隻20卡鑽戒做禮物，仲叫Chilam再努力啲工作唔可以退休，Chilam即O晒嘴好愕然話：「我都鍾意呀！」最後佢哋得出嘅共識係一齊繼續努力喎！兩夫妻一唱一和嘅對答，令到一眾網民都笑爆嘴，仲大讚佢哋結婚20年都仲係咁Sweet添！