东网电视
更多新闻短片
歌手吴业坤（坤坤）向来充满女人缘，不但同过唔少女神级传绯闻，更与薛家燕、汪明荃等前辈级艺人关系甚好，真系“3岁到80岁”嘅女士都畀佢冧得掂，就连一代女神李丽珍都抵挡唔住佢嘅魅力！呢日李丽珍于社交网大晒与吴业坤嘅合照，多谢佢请食饭，相中佢哋搭晒膊头、揽头揽颈，仲头贴头零距离接触，相当老友。而呢个咁特别嘅组合，令唔少网友都大感惊讶，估唔到佢哋竟然咁友好，又指希望佢哋能够合作拍戏。
李丽珍同吴业坤搭晒膊头，网友都估唔到原来佢哋咁老友。
李丽珍仲多谢坤坤请食饭添！
坤坤同李丽珍睇落好似大缆都扯唔埋，但其实以往坤坤都曾经出席过对方嘅生日会，佢回覆东网说：“我哋其实都识咗几年，虽然冇合作过，但因为有班common friends，间中会食餐饭，咁啱common friends入面有人开咗间日本餐厅，咁咪一齐食饭啫嘛。”他可会希望有机会跟李丽珍合作拍戏？他说：“当然讲演戏梗系想向前辈学习多啲，嗰日食饭大家都知道佢提名咗金马奖最佳女配角，所以都希望可以向佢学习吓演技。”
其实坤坤好友陈国峰（左）系李丽珍嘅健身教练，难怪会撮合到2人成为好友。
