何依婷童年版孖妹勁搶眼！鄭寶鄭貝跳唱演全能

無綫台慶劇《十月初五的月光》現正演播，當中除咗有何依婷一人分飾三角成為熱話外，飾演莎莎及莎華（何依婷分飾）童年版嘅一對孖妹鄭寶及鄭貝都一樣引起熱議，劇中2人演技自然，孖住「媽媽」米雪又跳又唱，相當吸睛。與此同時，其實佢哋都有份演出另一人氣台慶劇《星空下的仁醫》，飾演身懷重病嘅孖妹，有多場爆喊戲一樣獲得網民讚賞，加上日前（22日）撞正《十》首播及《星》大結局，均有孖妹參演嘅場口，曝光度十足，人氣一時無兩。

其實現年12歲嘅鄭寶及鄭貝大有來頭，雖然佢哋年紀輕輕，但幕前演出經驗非常豐富，除拍過唔少電視劇及廣告，又亮相過ViuTV節目《ERROR自救TV》外，更係跳得唱得之人，佢哋今年於《2021亞洲模特盛典暨ACE演藝大獎》中脫穎而出，憑跳唱韓星Hwasa及Jennie的《Maria & Solo》勇奪演藝大獎冠軍，更獲「美容大王」唐安麒睇中，簽約成為旗下藝人，唱、跳、演樣樣皆精，星途無可限量。