「處女」成就解鎖！霍嘉恩奉獻「第一次」嗌緊張

歌手兼開電視主播霍嘉恩（Gracey）近日為熱播日劇《信樂的喜美子》獻唱粵語主題曲《焰紅》，呢次更係佢嘅劇歌處女唱，所以佢話心情寧舍開心、興奮，簡直係成就解鎖︰「嗰種開心係，出歌對於我嚟講絕對唔係易事，依家有機會唱新歌同時，仲要係唱到主題曲，而套劇係有100集，換言之首歌會洗腦式播足咁多次，呢個真係個驚喜！」

除咗有唱劇歌呢個突破之外，Gracey仲獻出咗佢嘅「第一次」，就係第一次拍MV有男主角︰「去到後期先知，第一首歌《感謝信》個MV都係得自己一個，一聽到有男主角就唔知要做啲咩，係有啲小緊張！」佢憶述MV拍攝當日一早就去到沙灘取景，打頭陣就係要拍同男主角好Sweet嘅拍拖甜蜜畫面︰「諗番都覺得尷尬，哈哈！一嚟就要咁親密，好似熱戀中嘅情侶咁攬住，但當時我同個男仔係完全唔識，不過另一方面又驚阻到個拍攝進度，就開始傾吓偈認識吓，盡快投入角色，之後仲拍咗一齊玩陶瓷、同分開要喊嘅場口，自己都好期待個製成品！」