黎耀祥帶貨直播變答問大會

「視帝」黎耀祥喺無綫台慶劇《拳王》中飾演嘅「石傲山」，轉數夠快，能言善辯，最叻打逆境戰。佢戲功強勁，但做網紅帶貨尚算初哥，尤其見到大批網民湧晒入嚟猛問嘢，搞到佢緊張到個腦實晒，條脷打晒結。

佢推銷床上用品時，唔係力sell張被有幾軟熟，個枕頭有幾軟硬適中，而係本着「好客之道」，掛住答湧入嚟嘅客仔留言，佢重複又重複咁話：「是是是，對對對，好好好！」有網民問張大豆被嘅原材料係咪大豆粕，佢反問：「都是第一次聽說，以為被子裏有大豆！」

有網友同祥仔講，話猛答「是是是」似斷片：「祥叔你說點其他的，不要是是是，對對對。抱着枕頭不說話。是不是第一次直播？男神多說點話。」不過有唔少網民好包容，話佢做戲就叻啫，帶貨仲係新手，不如畀啲時間佢，唔好一味柴台，亦有網民幫佢平反，話佢狂答網民留言，係尊重網民嘅表現，想同大家有交流，唔係只hardsell。

至於同黎耀祥老友鬼鬼嘅李國麟，亦有加入直播帶貨行列。可惜佢日前喺直播時賣力推銷產品，播了足足8小時，貨竟沒賣出去幾件，有網民更估計他賺不到200元，淪為「最慘帶貨明星」。