東網電視
更多新聞短片
組合草蜢成員蘇志威及太太劉小慧以夫妻檔首戰工展會做檔主，不時落舖打躉化身推銷員，後者更自爆賣到失聲，從未擔心過不能回本，只怕唔夠貨賣；而前者亦大力士上身做搬運工人，完全放下藝人光環事事親力親為，難怪吸引成大班街坊圍觀！
劉小慧同蘇志威兩公婆拍住上！
劉小慧事事親力親為。
蘇志威起初都唔睇好老婆賣底褲！
日前兩公婆現身會場，雖然攤位「的骰」，但五臟俱全，除了出新招賣內衣褲之外，還有頂級和牛、自家製花膠湯包，見劉小慧一時忙於幫Model公仔換內衣褲、一時見有客到就落足嘴頭Sell產品，全程一腳踢！二人受訪時大耍花槍，小慧「大呻」一開始有被老公質疑賣內衣褲：「佢話我好奇怪，點解賣嘢食又走去賣內衣褲，就係因為我鍾意！」蘇志威即認「衰仔」笑說︰「當街當巷擺晒出嚟，人哋會唔會埋嚟買？好似好尷尬又冇得試，但原來我錯晒，佢不知賣得幾好！」
劉小慧透露暫時內衣褲銷情最理想，率先「跑出」，問到開檔數天是否已經回本？她直認冇擔心過回本問題，唯一是怕賣得太好冇貨︰「開始幾日又未賺到錢嘅。（今次投資咗幾多位數字？）冇乜點投資，廠家咁啱係跟咗我老公幾十年嘅Fans，做呢啲利潤唔會太高，未試過做線下零售，好鍾意做『大笪地女王』，真係好好玩！」蘇志威冧爆話老婆即使做不了工展會小姐，相反可以做工展銷售女王。
因開檔不時要叫賣，劉小慧自爆開工第一日已經講到聲沙，全靠獨門秘密開聲再吸客︰「平時開Live一次過對一千幾百人，依家係一對一，有好多人排隊等住我Sell，加上戴住口罩，搞到講嘢大聲用錯力。」問有甚麼「出口術」招數？蘇志威為妻搶答︰「佢考天才波咋！」問到有今次經驗後，會否心郁郁轉戰開街舖？他們笑說未有諗到太長遠，若然是期間限定店合作都可考慮。
劉小慧嗌到聲沙！
做銷售女王！
賣埋靚花膠！
好有生意頭腦呀！
講到開檔難忘事，蘇老闆自詡首日、第一包和牛是他的「傑作」︰「只係同個男顧客傾偈，最後佢講咗句『蘇老闆你賣嘅嘢梗係有保證』，睇吓個價錢就買咗，聽到呢句覺得好開心！」又指好多人都只睇表面，擺得入口就應深入研究、了解︰「唔係淨係分A4、A5，呢個只係一個大指標、脂肪嘅分布，其實要睇埋咩牧場飼養同品種，就算啲人行埋嚟唔買都好，咪當同朋友傾吓偈，分享吓點分和牛，幾得意㗎！」劉小慧開心Share另一件難忘事，見一位男顧客來回多次攤位查詢，最後帶埋老婆、仔女返轉頭幫襯，寧舍感到窩心！
