忙操Fit加練歌　凌文龍排練音樂劇有壓力

藝人凌文龍今日（28日）現身九龍灣跟師傅學習，為肢體殘疾人士維修電動輪椅。他笑稱自小愛砌模型，最愛裝拆家中物件研究：「細個試過拆開屋企部電視，一望到入面咁複雜，掃一掃啲塵即刻上返啲螺絲，抹咗當整咗，哈哈。」

他透露近日忙於為音樂劇排練：「今次套劇會跳舞同唱歌，所以要操體能同跟老師不停練歌，都有啲壓力。（唱成點？）唔知老師係咪想令我有啲自信，佢話我唔同咗喎。（自己覺得呢？）應該仲有進步空間嘅。」他感恩今年能有多方面嘗試，會把握每個機會盡力做到最好。