何雁詩宣布大肚　6月預產期恨見B仔出世

歌手何雁詩與鄭俊弘（Fred）2020年拉埋天窗，並於去年11月補擺喜酒，講明恨生BB嘅二人喺前日（11日）忽然晒出合唱片，並賣關子要唱歌畀「Dear Little One」，吊足網友胃口兩日，今日（13日）何雁詩終於發長文公布大肚喜訊，仲自爆BB仔男仔，預產期為今年6月中！

何雁詩冧爆宣布佗緊「虎年BB」，指一知道自己懷孕之後，佢同Fred都勁興奮，雖然懷孕過程中佢情緒上都有大大小小嘅變化，不過Fred都一一聆聽佢嘅憂慮，又照顧佢嘅所有需要，令佢唔再覺得孤單，仲大讚老公既體諒又貼心，第時一定會係一個滿分老竇！而Fred都同步更新社交網，同樣公布喜訊，大談自己做老竇嘅心情，指自己都要小心照顧老婆，仲自爆情緒好似暴風一樣，開心、興奮、擔心、恐懼咩都有，不過一切都會聽天由命。

身為何雁詩好姊妹之一的賴慰玲，今日（13日）受訪時表示一早獲悉對方佗B：「我好戥佢哋開心，佗仔就好啦，第時可以同我個仔一齊玩。（有冇分享孕婦心得畀何雁詩？）保持心境愉快，就係最好嘅佗B心得啦！」

而另一好姊妹陳瀅則指初初認識何雁詩，已覺得她是好媽媽，陳瀅謂：「因為佢好鐘意小朋友，當然我會早啲知（指何雁詩佗Ｂ）。總之戥佢哋兩個開心。」