《愛．回家》沈可欣扮演AV女優　Cosplay造型無限FF

無綫處境劇《愛．回家之開心速遞》集集有新故事，尋晚（23號）嗰集「Rebecca」沈可欣豁出去扮演AV女優，以多個造型包括Cosplay小丑女、性感睡衣、水手服、眼鏡娘登場，演出夠晒大膽！大家唔好誤會，絕無色情成份，大膽只係講緊現年46歲嘅沈可欣，罕有脫下以往賢妻良母嘅角色，就算近年「升呢」做秘書「Rebecca」斯文角色，今次變身AV女優可謂大解放，佢更將多個造型照放到社交網與眾同樂，問大家有冇收睇，唔少網民留言話特意睇尋晚一集支持佢，由頭笑到落尾呀！